Еве 5 работи што ми помогнаа:

1. Денска дремка 😴

Отсекогаш ми беше “трошење време” да спијам во текот на денот. Сметав дека тие 2-3 часа може многу попродуктивно да се искористат, сè до моментот кога останав бремена. 

Имав 2 избора: Да најдам начин да го игнорирам уморот, или, да си дремнам. 

Со оглед на тоа дека телото одеднаш почна да не ми поднесува кафе (на мое големо изненадување), се одлучив за “непродуктивниот” избор – да си легнам.

2. Шопинг 🛒

Моето искуство низ скопските продавници покажа дека купување облека за бремени е голем предизвик. Не затоа што сум прибирлива за облека или имам некои високи стандарди, туку едноставно имаше минимален избор на облека за трудници (во главниот град на државата, каде што нели треба да има сè?). 

Сепак, трчањето од една продавница во друга беше многу возбудливо, особено бидејќи демнееше опасноста да завршам со празни раце, а веќе немав фармерки што ми се точни во пределот на стомакот.

3. Дружење 🫂

Докторите ми препорачаа да не се мешам многу со луѓе поради ризикот од заразување со Ковид, па неколкуте дружби што ги имав со роднини и пријатели во текот на првите неколку месеци од бременоста ме мотивираа да останам будна за да не ги пропуштам тие ретки моменти на социјализација.

4. Свежо цеден сок 🧃

Морков, цвекло, лимон, јаболка – ова се намирниците што колку-толку ме држеа будна барем уште некој час, два додека да завршам со работните обврски за денот. 

Дури и кога не сум бремена, секогаш внимавам да внесувам повеќе зеленчук и овошје додека работам бидејќи имам низок притисок и секоја храна што потешко се вари, ме заспива (а тоа не можев да си го дозволам).

5. Гледање серии 📺

Нетфликс беше и сè уште е еден од моите најверни пријатели во текот на бременоста. 

Со оглед на неопходната домашна изолација и работењето од дома, успеав да бидам во тек со сите најнови филмови и серии. Не сум многу горда на тоа, но вредеше претплатата. 

Си велев – ако го сработам ова, ќе се наградам со 1 епизода од серијата што ја гледав. За среќа, оваа мотивација успеваше па ги извршував задачите со брзина на светлината.

Во “нормални услови” наместо Нетфликс избирам да читам книги, но токму книгите ме успиваа.

Од другата страна на паричката, кои работи ме успиваа?

• Читање книги – за некој што секојдневно чита, сега едвај успевав по 5-6 страници да прочитам без да се проѕевнам. 
• Слушање подкасти – колку и да биле интересни и поучни, често заспивав на нив.
• Прошетки во природа – спиењето откако ќе ги наполниш градите со чист воздух е најслатко.
• Обемни оброци – иако докторите препорачуваат 4-5 мали оброци во текот на денот, некогаш не можев да си помогнам да изедам цело тенџере леќа во едно седнување. 

Во време на пишување на блогот сум во 2от триместар и ми се чини дека заморот полека почнува да исчезнува. Затоа конечно и собрав енергија да започнам со овој блог.

Можеби и не е така трагично постојано да си уморен за време на бременоста. 

Можеби на овој начин телото ја чува енергијата за имаш сила кога бебето ќе се роди и да можеш да му ја пружиш сета љубов и внимание што ја заслужува тоа мало суштество. 

А токму бременоста на извонреден начин умее да ти покаже зошто треба да си го слушаме (и сакаме) своето тело. ❤️