Да се сврти нова страница во кариерата: Да или Не?

Како креативна и уметничка душа, кариерниот пат го започнав студирајќи на Факултетот за дизајн и технологии на мебел и ентериер во Скопје. Јасно ми беше дека тоа е она што ја поттикнува мојата имагинација да исплива и да ја имплементирам во нешто што и ден денес ми е предизвик. 

Уште поголем предизвик пред мене беше и формирањето на семејство, како и запливување во водите на мајчинствто. Приоритет ми станаа очињата што ми ја греат душата. 🤱

По завршувањето на породилното отсуство, се вработив и продолжив да работам во истата индустија, но не за долго. Незадоволството од претходните, но и од моменталните работни искуства како дизајнер за ентериери, ме натераа да свртам нова страница и да пробам нешто сосема ново.

Како се осмелив на таков чекор – промена на кариера?

За да промениш кариера, многу е важно да веруваш во своите способности. Да имаш јасна слика за себеси. Да знаеш што сè можеш и на што сè си спремен/а. 

Смелоста доаѓа и од поддршката што неминовно ја имав од мојот сопруг, а најмногу од желбата да можам да му овозможам многу повеќе на тогаш малиот toddler. И со тоа еден ден да му бидам пример. ✨

Аплицирав за работни позиции за кои што немав претходно работно искуство во таа индустрија. Тие беа поврзани со моето средно образование – економско. Секогаш сум имала афинитети и кон таа индустрија како и секоја тематика што опфаќа бројки.

Што ако навистина се случи?

Секако, се случи. Како човек кој што ја прифаќа секоја дадена шанса, се вработив како сметководител во странска USA-based компанија, што ми помогна да запливам во тие води. Се обучував и учев паралелно со тековната работа, истражував и постојано се надоградував. 

Најголемата пречка ми беше работното време – втората смена. На почетокот, решив да го прифатам тоа работно време и да пробам некако да се организирам со сите обврски. 

Така и беше. А грижата околу детенцето со мене еднакво ја делеше и сопругот. Тој ми беше поддршка за сè. ❤️

По околу 2 години, по многу пресметки и многу грижи околу организацијата, сепак на вагата повеќе тежеше времето што не го поминувам со моето дете. Ова пропуштено време не се заменува и е клучно во растот и развојот, како на детето, така и на нас како родители.

Работното место го заменив во друга компанија каде што добив поголема функција и одговорност. Од Accounting Specialist станав Financial Controller. Овде сè уште се надоградувам и напредувам и верувам тоа ќе продолжи во секој сегмент од работењето. 

Надоградувањето ќе продолжи и во мајчинството. Промената ми донесе и соодветно флексибилно работно време, што значеше и многу, многу слободно време за да бидам со најмилото. 👶

Секако, асот во ракавот за плус заработка е сè уште тука. Сè уште го користам моето знаење и искуство за повремено да работам freelance проекти за ентериер, доколку ми дозволува времето и доколку сметам дека е потребно. Уметничките особини секогаш се негуваат.

Дали целта ги оправдува средствата?

Во одредени сегменти во животот, неминовно е да се направат некои исклучоци. Од нас како жени се очекува, но и самите од себе очекуваме, да бидеме подеднакво посветени мајки, да имаме успешна кариера и да изгледаме добро. 

Кога се прават некои поголеми чекори, како промена на кариера во мојов случај, во ред е нешто да трпи, бидејќи се работи за постигнување на една поголема цел. Зацртаната цел ќе ги подреди нашите приоритети. 🎯

На крајот од денот, искрената насмевка и радосната прегратка што ја добивам од моето дете се ветерот во грбот што ме турка да продолжам да напредувам и да бидам исполнета и среќна мајка за него. И да, вистина е, кога сакаш – можеш сè!

Автор: Мери Тасевски