Како ефикасно да управувам со моето време? 🕔
Ова е еден од најголемите предизвици за мене како мајка и личност со голема желба за самонадоградување и континуирано учење во полето на проектниот менаџмент и софтвер тестингот како поле за кариерна трансформација.
Жонглирањето со работните обврски и грижата за децата може понекогаш да биде неверојатно тешко. Има денови кога самото тело очајно бара одмор и релаксација.
Но најчесто, тоа е невозможно, особено кога имаш 2 мали деца од 4 и 6 годишна возраст на кои им е потребно посветеност, работа и љубов.
Верувам дека секоја жена има денови кога „батериите ѝ се празни“ и кога ѝ доаѓа да се откаже од сѐ. Но, љубовта кон семејството, пред сѐ – кон децата и желбата за само-надоградување се движечка сила што ми дава волја за полесно да се справам со секојдневните обврски.
Исто така, позитивниот став кон животот и позитивната мисла придонесува многу за нештата да бидат поубави и полесни во оваа напорно и динамично време во кое живееме.
Секако, денес немаше да бидам тоа што сум без поддршка од семејството и луѓето со кои сум опкружена дома и на работа. За среќа, опкружена сум со луѓе кои се полни со разбирање и честопати наоѓаме заеднички јазик. 🫴
Понекогаш, иако перидов тоа е многу ретко, се трудам да одвојам време за активности во коишто уживам како топла шолја кафе во самотија, убава книга доцна навечер, пијалак со другарките и секако – повеќе слободно време за патување со семејството.
Како личност која обожува да патува и да истражува, би сакала да ја пренесам таа пасија и на своите деца.
Воспоставувањето јасни граници помеѓу работата и личниот живот ми помага во намалување на стресот и создавање на побалансиран начин на живот. Тоа значи поставување на одредени работни часови и избегнување на работни обврски надвор од работното време.
Ова е доста тешко, поготово во период на кариерна трансформација што бара многу работа, посветеност и откажување од некои работи. Се трудам да одвојам што повеќе време за дружење со децата, да растам и да се развивам заедно со нив, затоа што детството нема реприза.
Малите работи се тие што нѐ прават среќни како семејство и остануваат запаметени засекогаш.
Концептот на рамнотежа помеѓу работата и животот е субјективен и постојано се менува. Не станува збор за наоѓање статичка рамнотежа, туку за разбирање на нечии приоритети во различни животни фази.
Како родители, растеме заедно со децата, се менуваме и развиваме заедно со нив. Кога се мали бебиња, потребно и неопходно им е директно внимание и присутност.
Со растењето се развиваат во личности со свои ставови, карактер и желба за поголема самостојност и донесување на одлуки.
Добра организација и квалитетно и ефикасно поминато време е секогаш најдобриот избор за полесно справување со секојдневните обврски и предизвици. Сето тоа овозможува и поголема посветеност кон работата и семејството.
Но, има денови кога е многу тешко да се воспостави тој баланс помеѓу работните и семејните обврски. Понекогаш се појавува чувство на вина и тага дека не поминувам доволно време со своите деца или дека работата е недовршена или половично завршена.
Во тие моменти земам длабок здив и си велам „Јас МОЖАМ!“ На тој начин тешкотијата која ја чувствувам се намалува и продолжувам напред. 💪
Автор: Драгица Чобанова
© 2023 Created with love