Кога е вистинско време да им кажеш на работодавците дека си бремена (+ што ако си фриленсер)?

Еден студен ден во декември…

Први недели од бременоста.

Си дадов за задача да соберам Х сума на пари пред да го родам бебето (да имам заштеда во случај на подолго отсуство од работа).

Објавив оглас на LinkedIn дека сум отворена за соработка за компании и индивидуи на кои им е потребен квалитетен контент на англиски и македонски јазик.

Почнаа да ме контактираат луѓето со понуди. Но, ме контактираше и мојот тогашен работодавач.

-Данче, зошто објави оглас дека си отворена за соработка? Зарем не си задоволна овде? Зарем не ти чини платата што ти ја даваме? Што е проблемот? – ме праша тој.

Се гледав долгорочно во таа компанија, па решив да бидам искрена со човекот и да си признаам.

-Само што дознав дека сум бремена. Ќе ми требаат повеќе финансии за бебето.

Човекот пребледе. Почна да мрмори. Не очекуваше ваков одговор.

И јас не очекував, но разговорот продолжи во насока дека можеби е подобро да си се фокусирам на соработките со другите компании и да се откажам од конкретната позиција.

Очигледно, неколку недели подоцна ги раскрстивме нашите патишта.

Прашањата што ден денес си ги поставувам се следниве:

🤔 Дали ако не кажев дека сум бремена, сè уште ќе работев за таа компанија?

🤔 Зошто на бременоста се гледа како состојба кога жената е кревка и слаба?

🤔 Зошто кога ќе речеш на работодавец дека си бремена, веднаш им се менува перцепцијата за тебе? Како наеднаш веќе да не си толку способен како до сега да си ја вршиш својата работа? А напротив, најчесто си помотивиран за разлика од претходно.

Секако, постојат и исклучоци што најискрено ќе се израдуваат за твојата бременост и ќе ти го дадат потребното време за да се посветиш на бебето.

Сигурно ќе бидеш нервозна пред да ја споделиш новоста, но не заборавај – ти не правиш ништо лошо! Носиш бебе на овој свет, не бегаш на 3 месечен одмор и ги оставаш колегите на цедило. 🤦‍♀️

Да преминеме на главното прашање.

Кога е вистинско време да им кажеш на работодавците дека си бремена, а да не си ја загрозиш работната позиција?

Зависи.

Ако си во 1от триместар од бременоста…⬇️

Ако работиш од канцеларија или онлајн најдобро е да си ја чуваш веста за себе поради ризикот од спонтан абортус во првите неколку недели. Секако, ако имаш патолошка бременост, ќе треба веднаш да ја известиш компанијата за новите околности.
Ако имаш работа што е физички интезивна, веднаш извести ја компанијата за да не го ставаш своето бебе во ризик.
Ако имаш интервју за работа, најдобро е да си молчиш. Можеби нема да се договорите за работната позиција. Или, пак, по месец, два или пробниот период сфатиш дека си го губиш времето во компанијата. И секако, ризикот од спонтан абортус кој, за жал е доста чест.

Ако си во 2от триместар од бременоста…⬇️

Ако одиш на работа во канцеларија и да си молчиш за бременоста, наскоро стомакот ќе започне да ти се познава. Најдобро е отворено да разговараш со работодавците и заедно да смислите најдобри практики како да не ја занемариш работата на сметка на бременоста.
Ако работиш онлајн и сметаш дека ако им кажеш, веднаш ќе се фрлат во потрага по твоја замена, можеби е подобро да си молчиш се додека не влезеш во 3от триместар.

Ако си во 3от триместар од бременоста…⬇️

Ако си во 3от триместар и работиш онлајн дефинитивно треба да спомнеш дури и да не планираш да земаш породилно отсуство. Секако ќе имаш неколку денови кога животот ќе ти биде невиден хаос додека да стекнеш некоја рутина со бебето.

Ако си фриленсер…⬇️

Ако работиш на краткорочен проект, нема поента да ја споделуваш веста ако проектот заврши пред да се породиш.
Ако работиш на долгорочен проект, коректно е да ја споделиш веста за твојот работодавец да се организира со човечките ресурси.
Ако планираш да прифатиш одреден проект, имај на ум тајмингот да се вклопува во твоите планови.

Ако имаш свој бизнис…⬇️

Ако имаш свој бизнис или си дел од раководството на фирма, ќе треба да се организираш со твоите бизнис партнери за тоа како ќе тече бизнисот и кој ќе ги преземе твоите обврски додека да се вратиш.
Ако си solopreneur и имаш можност, заврши си ги задачите за неколку месеци однапред. Или пак, нема да е крај на светот ако паузираш неколку месеци.

Без разлика кога и да решиш да ја споделиш новоста, имај на ум дека оние компании што бременоста ја гледаат како закана за нивниот работен тек, не вредат да си го трошиш времето, енергијата и нервите со нив.

Во оние компании што од срце ќе ти честитаат и можеби ќе ти купат и некој подарок по овој повод, вреди да ја вложуваш својата експертиза.

Simple as that.